Baixo a dirección de Antonio Piñeiro ve a luz esta singular e fermosa obra que recolle textos autógrafos de 37 poetas galegos contemporáneos. Toda unha xoia ao alcance de cen privilexiados.

Antoloxía poética ao coidado do escritor Alfredo Pérez Alencart. Nesta obra aparecen poemas (algúns deles manuscritos) dunh ampla nómina de poetas de todo o mundo. A escolma nace como homenaxe aos poetas Francisco Brines e Ramón Palomares.

Quince cordas sonorosas, de distintas intensidades e matices, de moi diversos mundos e rexistros, quince voces que van da prosa poética á canción amorosa, lírica, doce, ou desgarrada, ou o poema visual, e que ofrecen unha panorámica da nova poesía galega, filla do noso tempo e sabedora da súa rica tradición.

Antoloxía que recolle textos en verso de oitenta poetas de todo o mundo acompañados polas fotografías de Eduardo Magaratto. Entre os poetas galegos figuran Miguel Anxo Fernán Vello, Luís González Tosar e Modesto Fraga.

Caderno de poemas editado pola Universidade da Coruña con motivo dos recitais poéticos celebrados no faro de Fisterra co gallo do programa "Aulas no camiño". Recóllense textos de Manuel María, Bernardino Graña, Rosa Méndez, Rafa Villar, Alexandre Nerium, Salvador García Bodaño, Miro Villar e Modesto Fraga.

AMOR Á DIGNIDADE PALESTINA

Eu sei que por amor aínda vives
aínda existes
resistes aínda
heroica Palestina

Seino polos ollos dos que anuncian
territorios liberados
polas mans dos que levan as unllas partidas
de rañar horizontes

¿Qué son a metralla, os sharóns
a desmemoria, as mentiras
para negar a xustiza
de tanta terra asoballada?

Eu sei que vives
que existes
que resistes aínda

Convoco a luz
e véxote, escoito

a dignidade
o latexar dos corazóns
de homes e mullers
coa mirada fixa
nos eidos de Nablus

“Pedra fronte a mísil”
contra a barbarie,
falo coa voz de Bodaño
coa lucidez da liberdade,
contra a mentira

porque minte o poder
a historia minte
porque minten todos
minte a biblia, minte, minte

Goliat non morreu
a pedra de David
finou nos vestixiosda mentira
do seu propio veleno